Maya aku scroll ba fb tadi, tepedaka siti post pasal bodybuilder bansa kitai ti udah tampak rita tapi nadai kala dikemesaika orang sebelah media..Nyadi, ngau tu aku deka ngelalu ke kitak maca pasal Buda tok..Ngaika nadai org nemu pasal tok dudi ari ila..Ngai muji diri, aq bc meh ati ka nyadi bodybuilder tok..Tang meh agi sekula..Begunaka duit..Munyi ko ciko bodybuilder ari Bintulu ti udh mega tebilang nama bebansa cina,Leslie Lim, "No Money, No Body" ko ea..Haha..Bah..becerita dulu ga kitai bekaul ngau Buda Anak Anchah tok..
Buda, bansa Iban keterubah ngangkatka nama Malaysia dalam main ‘bodybuilder’
Dikarang Matth William
KUCHING: Buda Anchah siku bansa Iban ti pegari ketegal udah ngangkatka nama menua Malaysia ba main ‘bodybuilder,’ ukai semina ba tikas nasional aja tang mega ba tikas antarabansa. Taja pan begempal isi tubuh, tang Buda siku orang ke siru, rindu betundi sereta manah enggau begulai seruran ngarapka diri mengkang ulih ngarika Sarawak tauka Malaysia dalam main nya sekumbang iya agi gawa ba Soldadu Langit Malaysia (TUDM).
Lebuh ke dikerandau pengarang berita apin lama ke udah, iya madah diatu iya benung gawa enggau TUDM nyadi pegawai waran, taja pia menua Sarawak endang seruran dalam ati taja pan iya suntuk jam magi pengerindu entara main nya enggau pengawa ke sama bela pemerat ba iya.
“Aku berengkah enggau main bodybuilder dalam taun 1996 pengudah dua taun aku gawa ba TUDM. Sebedau gawa ba TUDM, aku ngaku diri endang ngembuan semina mimit aja penemu ba main tu,” pia ku iya madah ngagai The Borneo Post apin lama ke udah.
Buda mega siku peminat bodybuilder sereta pelakun ti tebilang nama, peranak Amerika-Austria Arnold Schwarzenegger, madah keterubah endar iya ngenyinakka diri ba main nya kena ngiarka asai lelengau ati ke diri sebilik.
“Maya nya, aku jauh ari kami sebilik sereta seruran ingatka menua Sri Aman, endur aku ada. Taja pia, aku seruran ngiga runding kena nyingkang nyentuk ke aku bulih pemujur dalam main tu,” pia ku iya.
Udah mayuh gelar ke dimenang iya sekalika ba tikas nasional enggau entarabansa nyengkaum dibulih gelar Mr Malaysia enam kali, sereta mujur menang tiga kali ba pekit tikas entarabansa dalam kategori ke dipasuk iya.
Buda mega udah menang ba pekit ke diatur World Bodybuilding and Physique Sports Federation di Budapest, Hungary dalam kategori Master’s Open dalam taun 2013.
Kelimpah ari nya, iya mega bisi ngarika menua Malaysia ba Sukan SEA.
Ba pekit bodybuilder Asia Tenggara ke-12 ti diatur ba Singapura kena bulan Jun tu tadi, Buda udah nyadi champion dalam kategori 70kg.
Enda puas enggau nya, Buda Anchah sekali ngemanahka nama menua Malaysia sereta bulih gelar Mr Asia ba Pekit Asian Bodybuilding Fitness and Physique Sports Championship ke-48 di Macau ke diatur belabuh ari 26 Ogos nyentuk ke 1 September tu tadi.
Ku Buda, endang seruran nyadi juluk ati iya ngelama tu bulih gelar ba pekit ke beprestij.
“Nadai lebih ari ngemegahka aku ari ninga lagu Negaraku dipasang. Aku berasai puas endar ati taja pan bisi asai lelak. Main tu ngemuaska ati aku lalu aku deka ngemajakka iya,” pia ku Buda.
Buda mega madahka diri deka bagas agi belatih enti sema dipilih ngarika Malaysia ba pekit Mr World, ke disadang deka diatur dalam bulan Disember di Mumbai, India ujung taun tu ila.
Bah..naka tok dulu meh jerita kitai bekaul ngau Buda tok..Tok pun udh cukup meri inspired gai aku ngambika ulh ngau dudi ari ila..hahaha
P/S: Anang enda ingat, LIKE dulu page tok Randauruai Blogspot ngambika ke kitak ulih nitihka nama-nama utai ke bekaul ngau pemansang ba dunya tok..Terima Kasih aok..Bye2
06:12 |
Category: |
0
comments
Comments (0)